Anáris mannan vahkus dollojuvvon sámenuoraid dáiddadáhpáhusas besse Anárlaš nuoraid teáhterbihttá Komovuotâsämmiliih (Gomuvuođa sámit), Ohcejoga nuoraid Gufihtarlonuhus ja Gárasavvona nuoraid Uldda lonuhus vulget sámenuoraid ovddasteaddjin riikkaviidosaš TEATRIS-dáhpáhussii Vaasai miessemánu loahpas.
Sajosis ordnejuvvon dáiddadáhpáhussii oassálaste oktiibuot 12 sámegielat teáhterjoavkku iežaset čájalmasaiguin. Stipeanddaid ožžo guhtta joavkku, mat ledje Anárašgielalaš Čáhálig aarni, Ohcejoga ja Sirmá nuoraid oktasaš davvisámegielalaš Meahccemánát-joavku, davvisámegielalaš Avvila joavku, Gáregasnjárgga nuoraid davvisámegielalaš Gáregasnjárgga gopmit-joavku, Roavvenjárgga sámegiela oahppiid joavku ja Avvila logahaga ja badjeskuvlla sámeoahppiid Juonalaččat-joavku.
Rahpandoaluin loaiddaste breakdance Eurohpa, Davviriikkaid ja Suoma meašttir Jimi Kettunen , baleahttadánsut Auri Ahola , Katja ja Biret Haarla ja Hilda Länsman Gájanas -joavkkuinis. Dáhpáhussii oassálaste sámenuorat, sámeoahpaheaddjit ja eará olbmot badjel 400:s. Sámiid ruovttuguovllus bohte oassálastit measta juohke gilis. Sámeguovllu olggobealde ledje oassálastit Helssegis, Oulus ja Roavvenjárggas.
Nuorat oassálaste rahpanbeaivve áigge dáiddabargobájiide, maid váldotemán lei dánsun, mii boahtá leahkit boahtte jagi dáiddadáhpáhusa váldotemá.
Gáldun: Sámediggi