Sanoma -lágádus almmuha sámi álbmotbeaivve Disney beakkán Frozen máidnasa davvisámegielat giellaveršuvnna. Frozen čoaska fearánat -girjji lea jorgalan Veikko Holmberg .
- Fidniimet jurdaga jorgalit Frozen máidnasa mannan čavčča, go dan birra čállojuvvui aviissas, muitala doaimmahushoavda Viia Viitanen .
Dálá plánaid mielde dat almmuhuvvo Sanoma -lágádusa elektrovnnalaš mánáid máinnassiiddus. Máidnasii lasihuvvo maid jietna, nu ahte dan sáhttá guldalit.
- Mis lea juo gárvves ruovttusiidu mánáid várás, de lea álki almmuhit girjji elektrovnnalaččat ja dasa jietnabátti, čilge Viitanen.
Frozen máinnas boahtá leat olggosoaidnit dego dat girji.
- Mánáid máinnassiiddu bokte dat lea nuvttá ja dan sáhttet lohkat buohkat miehtá máilmmi, illuda Viitanen.
Ášši jođálmahttá dat go Sanomas leat juo vuoigatvuohta Frozen girjái Suomas, de ii dárbbaš buot vuoigatvuođaid ráđđádallat álggu rájes. Disneys leat čavga njuolggadusat ja eavttut.
Dán birra lea ráđđádallon Disneyn ja Sámedikken.
Sámedikki oktavuođaolmmoš Neeta Jääskö mielde sámediggi evttohii jorgalit girjji buot Suomas hállojuvvo sámegielaide, muhto Disney lei miehtan dušše ovtta giellaveršuvdnii.
- Dát davvisámegielat jorgalus lea goit hui somá ja mávssolaš, lohká Jääskö.
Viitasa mielde áigetávval lea nu jođán, de dál ii leat realisttalaš almmuhit girjji. Girjji deaddileapmi lea divrras ja ádjás bargu, eaige leat smiehttan girjji olggosaddima vel.
Sámi mánáid vánhemiidda dát lea buorre ođas.
- Dárbu lea nu stuoris. Jorgalan ieš Frozen -máidnasa measta juohke eahket iežan niidii, muitala Anna Näkkäläjärvi-Länsman .
Su ii hehtte ahte girji ii deaddiluvvo.
- Oasttán dan girjji ja liibmen teavsttaid dasa, smiehtada Näkkäläjärvi-Länsman.
Viitasa mielde almmuheami doarjjui maid dat, go ON lea bidjan ođđa bissovaš ovdáneami ulbmiliid. Dan olis Unesco doaibmabidju lea Skuvlejumi 2000-lohkui prográmma, man fáddán leat ee. olmmošvuoigatvuođat. Dán barggu Sanoma bargá pro bono nappo buorredagolašvuođas.
Mistä on kyse?
Sanoma julkaisee saamelaisten kansallispäivänä suositun Disneyn Frozen huurteinen seikkailu – kirjan pohjoissaamekielisen kieliversion.
Käännös julkaistaan sähköisesti Sanoman Lasten oma satukirjasto – sivustolla ja se on ilmainen kaikille ympäri maailmaa.
Kirjaan liitetään myös äänite. Ei ole päätetty vielä julkaistaanko kirjana.