POLURA-hápmosis, dehege boazodoallo- ja lotnolasealáhusaid ráhkadusdoarjagiid ásahushápmosis, sáhttá dál cealkit. Cealkináigi lea 31.01.2016 rádjái.
POLURA-ásahusain mearridit ee. boazodoallo- ja lotnolasealáhusdálu sturrodagas, doarjagii gáibiduvvon ámmátdáiddus, huksen- ja fitnodatdoaibmaplánaid sisdoalus, boazodoalu hálddašeamis ja dietnasis.
Ásahussii leat boahtime muhtin veardde rievdadusat. Skohtera dehe njealjejuvllaga oastimii oaivvilduvvon doarjja, mii rehkenastojuvvo daid hattis, loktanivčče 30 %:ii ja doarjaga sáhtálii ohcat skohterii golmma jagi ja njealjejuvlagii njealje jagi gaskas. Dál doarjja lea 20% ja dan sáhttá ohcat viđa jagi gaskas. Ođđa doarjjaproseanta eaktun livčče goitge, ahte ohcci bargá dainna skohteriin 45 beaivvi bálgosii dehe dainna njealjejuvllagiin 30 beaivvi bálgosii. Juos bargobeivviid mearri ii ollašuva de doarjja livčče 20 %.
Ásahusas leat ođđa rájit iežá sajis go boazodoalus boahtti dietnasii. Juos dienas manná ráji badjel de doarjaga ii leat vejolaš oažžut. Dienasrádji lea 40 100 euro dálu huksemii ja 39 000 euro iežá doarjjačuozáhagaide. Juos náittosbárragotti ohcá doarjaga dálu huksemii, de dienas ii sudnos oaččo mannat oktiibuot badjel 52 000 euro. Doarjjadohkalaš ođđa dálu sturrodat oažžulii leat dábálaččat eanemusat 110 m².
Nu daddjon álggahandoarjja mieđihuvvo ohccái, gii lea vuollel 41-jahkásaš delle go ohcá dan ja gii álggaha boazodálu doalu vuosttaš geardde. Dasa lassin doarjaga ohccis gáibiduvvo skuvlejupmi ja fitnodatdoaibmaplána ollašuhttin. Ohccis galggalii leat maid dálu oastima maŋŋel unnimustá 80 bohcco ja vaikko sus livččiige dan mađe bohccot, de son galgá goitge loktet boazomeari 1,5 geardásažžan jagi geažis das go doarjja lea mieđihuvvon. Álggahandoarjja lea eanemusta 25 000 euro.
Fitnodatdoaibmaplána sulastahtá dálá lága ealáhusplána. Sámeguovllu boazodoallit leat geatnegahtton muitalit fitnodatdoaibmaplánas, mo boazodoallu ovddida sámekultuvrra seailuma.
POLURA
Ođđa POLURA-láhka boahtá maid fápmui dál álgojagis. Dasa leat váldon vuhtii EU:a eanandoalloruhtaráju ođastusat ja doarjjanjuolggadusaid rievdadeapmi. Ulbmilin lea maid ovddidit, ahte doarjagiid bastálii ohcat interneahtas.
Nuortalašlága boazo- ja lotnolašealahusaide guoskevas doarjagat bohtet dán ođđa POLURA-láhkii. Ulbmilin lea, ahte seammálágan doarjagat bohtet seammá láhkii.
Dieđut POLURA-ásahusa birra: mmm.fi/lausunnoilla.
