Europarlamentarihkar Sirpa Pietikäinen (kok) čállá sámi rivttiid birra Aamulehti-aviissas ja sámi álbmotbeaivve bloggačállosisttis.
Son imaštallá dan, ahte Eurohpa Uniovnnas váilu čielga sámepolitihkka, vaikko sápmelaččat lea EU:a áidna álgoálbmot.
Pietikäisis leat vuordámušat, ahte EU galggalii dorvvastit sápmelaččaid rivttiid.
- Álgoálbmogat leat váldojuvvon vuhtii EU-politihkas, muhto daid sajádat oidno eanaš EU gávpe- ja ovddidanriikabargooktavuođain goalmmát riikkaide, Pietikäinen čállá.
Pietikäinen gáibida suoji erenoamažit árbevirolaš ealáhusaide ja sámi boazodollui.
Europarlamentarihkar Sirpa Pietikäinen mielas EU:s galggalii leat mekanisma, man bokte álgoálbmogiid sáhtášii gullat buorebut.
- Eurohpa parlameanta evttohii jagis 2014, ahte álgoálbmogiid gullanrievtti ja dohkkeheami galggalii dorvvastit EU-dási láhkaásahemiin, Pietikäinen čállá.
Pietikäinen čálus gávdno maid su bloggasiiddus (suomagillii).