Skuohtanjárgga orohaga Nils Máhtte Eira vuittii mannan vahkuloahpa áigge Tankaváris dollojuvvon njoarostangilvvu. Vuoittus son oaččui bálkkašupmin njealljejuvlaga. Son vuittii Tankavári njoarostangilvvu maiddái diibmá.
Tankavári gilvvu njeallje buoremusa ledje Norgga beale sápmelaččat. Nubbin gilvvus bođii Lákkonjárgga orohaga Mikkel Andreas Eira . Goalmmádin bođii Skuohtanjárgga orohaga Lemet Aslat Eira , gii vuittii B-finálas Ánte Niillas Eira , gii lea maiddái Skuohtanjárgga orohagas. Gilvvus lei ulbmilin njoarostit gitta johtti stoalppu.
Tankavári njoarostangilvui oassálaste aktiibuot 35 olbmo. Gilvu galggai leat álgoálggus guovttebeaivvásaš, muhto oassálasttiid meari dihte gilvu čađahuvvui ovtta beaivve áigge lávvordaga.
Dán jagi bealde Suoma Sámis dollojuvvojit njoarostangilvvut maiddái Ijahis idja -festivála oktavuođas Ánaris 19.-20.08.2016.