Davvi Forum čoahkkanii mannan vahkus Jakutias Ruoššas. Dán háve čoahkkaneami temán ledje positiivvalaš eallinstrategiijaid plánen davvin, fitnodatovttasbargu Davvi Forumas, guovlostrategiijat dálkkádatrievdadeami ektui, davvi infrastruktuvra ja álgoálbmogiid árbevirolaš diehtu borramušain.
- Báikkálaš restauráŋŋas lágiduvvoje doalut gos fállojuvvui Sakha, Even, Evenki ja Sámi borramuš. Ulbmilin lei čájehit unnitloguálbmogiid áidnalunddot dieđu árbevirolaš borramušain ja dáiddu málesteamis, muitaluvvo International Center For Reindeerhusbandry bloggas.
Davvi foruma ođđa ságadoallin válljejuvvui Craig Fleener , gii lea árktalaš áššiid ráđđeaddi Alaskas, USA:s. Davvi Forum lea organisašuvdna mii bargá ovttas Árktalaš guovlluid jođiheddjiiguin, báikkálaš virgeolbmuiguin ja fitnodatolbmuiguin omd. USA:s, Ruoššas, Islánddas, Lulli-Koreas ja Suomas.