Washington D.C.:a gearretriekti hilggui bearjadaga Standing Rock Sioux čeardda gáibádusa bissehit Dakota Access -oljobohcci huksenbargguid North Dakotas, USA:s. USA stáhta ministeriijat leat goitge bivdán oljobohcci-fitnodaga eaktodáhtolaččat bissehit huksenbarggu dain guovlluin gos Standing Rock Sioux -čearda jelgii leat bassi báikkit.
Duopmostuolu oainnu jelgii čearda ii leat bastán čájehit, ahte huksenbargguid bisseheapmi livččii vealtameahttun eastadandihte vejolaš gillámušaid ja vahágiid maid huksen dagahivčče ja mat čuozále čerdii.
- Dát mearrádus čuohcá váibmui, muhto mii fertet joatkit dáistaleami ja geahččalit gávdnat iežá lágalaš geainnuid, muitalii čeardahistorihkar LaDonna Brave Bull Allard CBC-mediai.
Standing Rock Sioux -čearda stevdnii USA Army Corps of Engineers -virgeoapmahaša Washington D.C.:a gearretriektái go dat attii lobi Dakota Access -oljobohcci huksemii North Dakotas.
Čeardda ovddasteaddjit bukte ovdan stevdnenohcamušastis earret eará, ahte dát plánejuvvon oljobohcci manalii čeardda bassi hávdádanbáikki čađa ja sáhtálii golgat ja dagahit dan, ahte lagas jogat nuoskiduvvojit ja čeardda čáhceresurssat billistuvvojit.
Sullii 1770 kilomehtera guhkki Dakota Access -oljobohcci ulbmilin livččii fievrridit oljju North Dakotas, South Dakota ja Iowa bokte, Illioinisii. Oljobohcci manalii Standing Rock Sioux -čeardda Lake Oahe -nammasaš eatnama davábealde.
USA stáhta riekte-, soahteveahka- ja sisáššiid ministeriijat ilmmuhe goitge measta dađistaga duopmostuolu mearrádusa maŋŋel, ahte sii áigut árvvoštallat ođđasit mearrádusaid mat leat dahkkon bohcci huksenrájiid birra ja bivdán Energy Transfer Partnes -fitnodaga bissehit bargguid 32 kilomehter nuorttas ja davás Lake Oahes. Dát golbma ministeriija leat bargan oktasaš cealkámuša mas sii muitalit, ahte dát ášši lea buktán ovdan duođalaš dárbbu ságastallat riikkaviidosaš ođastusain nu ahte čearddaid oaidnu gudnejahttojuvvo dákkár áššiin.
- Stáhta áigu bovdet álgoálbmotčeardda lahtuid searvat virggálaš ráđđádallamiidda huksenprošeavttaid ja eananrivttiid birra dán čavčča, muitaluvvo cealkámušas.
Amerihká álgoálbmotčeardda viggamušat bissehit oljobohcci huksema North Dakotai lea bohciidahtán lihkadusa, mii lea ožžon fuomášumi ja doarjaga filbmanásttiin ja sosiála medias.
Sullii 1000 olbmo, earret eará álgoálbmotčeardda ovddasteaddjit ja birasberošteaddjit, čohkkeje proteastaleairra Missouri ja Canno Ball -joga gurrii lahka guovllu gosa oljobohcci huksen lea evttohuvvon.
Gáldun: CBC.ca, Reuters