Lulli-Suoma sámesearvi City-Sámit rs. lágida stuora sámi álbmotbeaivvedoaluid Helssegis 6.2.2016, mas sihke mánát ja ollesolbmot besset návddašit ođđaáigásaš sámemusihkas, muhto maid árbevirolaš kultuvrras.
Kulturguovddáš Caisas dollojuvvojit diibmu 13.00-15.00 Ima, Miro ja Niillasa mánáiddoalut.
- Mánát besset vásihit sámekultuvrra, gullat sámegielaid ja oassálastit ritmmaide, lávlagiidda ja luđiide. Mánát oidnet earálágan gávttiid ja oahpásmuvvet goikkehiidda ja gámasuinniide, muitala City-Sámit rs. dieđáhusastis.
Eahketfeasta dollo Teatteri Forumis ja dat álggahuvvo golmma biebmu eahketborramiin. Doppe návddašit bohcco viđa sierra hámis. Boazoolmmái Eino Nuorgam Gámasmohkis gohkke árbevirolaš boazobiepmuid ovttas Helssega njunuškoahkaiguin.
- Eahket joatkašuvvá konsearttain, gos lávddi alde lea sámemusihkka Suomas ja Norggas. Riikkaidgaskasaš beaggima háhpohalli Arvvas boahtá Helssegii vuosttas geardde. Joavku dohppe fárrui luođi, blues, americana ja álbmotmusihka ovttastemiin, dáhpáhusa buvttadeaddji Mari Korpimäki muitala.
Anárlaš Irdon ávvuda vuosttas skearrus almmustahttima álbmotbeaivvi konsearttas. Joavkku musihkas luohti deaivvada heavymetal-musihka ja fámolaš sinfoniija. Eahkeda goalmmát artista lea Ylva, man musihkkarat ovddastit golmma sierra riikkavulošvuođa. Joavkkus čuojahit 22-Pistepirkko lahttu Asko Keränen , sápmelaš diktačálli-musihkkar Niillas Holmberg , ruoŧŧelaš buvttadeaddji-musihkkar Stefan Kvarnstöm ja jazz-trumpetista Antero Priha . Joavku lohpida dohppet olbmuid mielde šamanisttalaš tránsii gievrras luohte-live-loaiddastemiin.
Eahkeda loahpas lea rabas lávdi (open stage session).
- Mii beare sáhttá dáhpáhuvvat, go dákkár mearri sápmelaš, suopmelaš, ruoŧŧelaš ja norgalaš čehppodat luoitiluvvo “veaiddalassii", Mari Korpimäki dáhkida.
Ávvudilálašvuođa ulbmilin lea čohkket sámiid oktii, muhto doaibmat maid deaivvadanbáikin.
- Dát leat sápmelaččaide, eandalii mánáide ja nuoraide, dehálaš dilálašvuođat iežas kultuvrras ja identitehtas nannema dáfus. Seammás dat fállet vejolašvuođa earáide oahpásmuvvat dálásápmelaš kultuvrii ja sápmelaččaide, City-Sámit rs. ságadoalli Pentti Pieski deattuha.