Suovastuvvon ja sáltejuvvon bohccobirgui ohcet Suovas-nammasuoji.
Suddjejuvvon álgonamahusa (SAN) ohcá Suomas Suoma Boazosámiid -searvi. Ohcamuš lea oktasaš Ruoŧa ja Norgga boazosápmelaččaiguin, dieđiha Suoma Eanandoallodoaimmahat (Mavi).
Suoma eanandoallodoaimmahaga dieđáhusa jelgii Suovas-namahusa oaččolii geavtit dakkár bohccobiergobuktagiin, mat suovastuhttojuvvojit ja sáltejuvvojit árbevirolaš sámi vugiiguin lávus dehe goađis. Suovasbiergun dohkkelii čoarbbealli, čoamohas, erttet ja olggut savodeahkki. Boazu galggalii leat šaddan ja guhton Suoma, Norgga dehe Ruoŧa sámeguovllus. Boazu galggalii leat maid njuvvon ja gorut ruvjejuvvon sámeguovllus.
Suoma Eanandoallodoaimmahaga oainnu mielde EU nammasuodjeortnet addá buktagiidda lasseárvvu ja suddje biepmuid ja eanandoallobuktagiid nama boasttogeavtimiin ja vearistemiin. Golaheaddjái nammasuodji muitala, gos buvtta boahtá, maid dat sisttisdoallá ja mo dat lea válmmaštuvvon. SAN-namahusa mihtomearrin lea namalassii, ahte buvtta boahtá dihto guovllus ja dat lea dahkkon dihto olmmošlaš vugiiguin.
Eanandoallodoaimmahat vástida nammasuodjeáššiid gieđahallamis Suomas. EU-komišuvdnages mearrida nammasuoji addimis ja registreremis.
Nammasuoji vuostečuoččuhusgieđahallan bistá 29.2.2016 rádjai.