Sihke Giehtaruohttasa bálges, Sámediggi ja Suoma luonddusuodjalanlihtu Lappi bire leat váidán Davvi-Suoma hálddahusriektái Tukesa 7.7.2016 addán mearrádusas mieđihit málbmaohcanlobi GTK:i Leahttáseanu guvlui Giehtaruohttasii.
Giehtaruohttasa bálges gáibida váidalusastis, ahte Tukes mearrádus gomihuvvo ja málbmaohcanlohpi hilgojuvvo. Váidalusas buktojuvvo ovdan, ahte lohpi lea mieđihuvvon guvlui mii lea earenomáš dehálaš sihke sámekultuvrra doalaheami ja ovddideami dáfus sihke luonddusuodjalanárvvuid dáfus. Váidalusas deattuhuvvo, ahte Tukes mearrádus rihkku ee. siviila- ja politihkalašrivttiid soahpamuša, Suoma vuođđolága, ruvkelága, boazodoallolága, sámediggelága sihke Natura 2000 -guovlluid suodjalannjuolggadusaid ja jekkiidsuodjalannjuolggadusaid.
Giehtaruohttasa bálgesa boazoisit Juha Tornensis mielas jo dušše dutkandoaibma málmmaid ohcama dihte buktá eahpesihkkarvuođa ja hehttehusa boazodollui miehtá dálvvi.
- GTK lea dadjan, ahte dat atná fuola, ahte eai leat jur guottetáiggi doppe, muhto das lea liikká stuora hehttehus, vaikko livčče giđadálvve doppe. Jagit leat iežáláganat ja ii dan dieđe goas dárbbaha gosnai leahkit bohccuiguin, dajai Tornensis LK Ságaide.
Guovlu gosa lohpi lea addon lea oassi meahcceguovllu, Natura-guovlu ja jekkiidsuodjalanguovlu. Tornensis muitala, ahte guovlu lea dehálaš boazodollui ja dat galggalii bissut ráfis.
- Dat lea dálvet dakkár golgangeaidnu, ahte dakko eai soabale leat luottat, ahte ii loktan čerrui. Dat lea dakkár báiki, mii galggalii leat dálvet ráfis ja bissut obbasin.
Su mielas Tukes mearrádus addit lobi lei nuppe dáfus vuordimis.
- Mii leat váidán dákkár áššiin ovdalge, ein molsašit fal dat báikkit gosa ohcet lobi, vaikko jáhkálii gal dat dál leat dutkan visot. Das ii oro leahkime loahppa. Ulbmilin ferte leat, ahte dutkamušat dahkkojuvvojit vejolaš ruvkedoaimmaid dihte. Maidba dat muđui dutkale, smiehtada Tornensis.
Tornensis lea fuolas das, ahte lagamus áiggis soitet boahtit lasi málbmaohcanlobit.
- Dietnai go namma lea Lätäs 1, nu orro leahkime, ahte sihkkarit leat válmmasin máŋggat iežatnai ohcamušat. Dathan bohtet álo ođđa dutkamušat, go moadde jagi lea gollan, nu huobmájit ođđa dutkanvugiid. Leat jo máŋgalot jagi dan dahkan ja ii oro nohkame agibeaivve.
Čálli lea Giehtaruohttasa bálgesa osolaš.
Tukesin päätöksestä valitettiin
Käsivarren paliskunta, Saamelaiskäräjät ja Suomen luonnonsuojeluliiton Lapin piiri ry. ovat valittaneet hallinto-oikeuteen Tukesin 7.7.2016 antamasta päätöksestä myöntää GTK:lle malminetsintälupa Lätäsenon alueelle Käsivarteen.
Paliskunta vaatii valituksessaan, että Tukesin päätös kumotaan ja lupa hylätään. Paliskunta huomauttaa, että alue johon Tukes myönsi luvan on tärkeä mm. saamelaiskulttuurin ja luonnonsuojelun kannalta.