Duottar Hearggit -searvvi Ánne Risten Sara geahččala dán vahkuloahpa oažžut 10. vuoittu Roavenjárggas lágiduvvon heargegilvvus.
- No dieđusge mun vuorddán vuoitu. Lean nu guhká jo gilvalan, ahte ii oro šat nohkka buorre, jus šaddá nubbin dehe goalmmádin. Jáhkán gal, ahte šaddá garra gilvu gitta lohppii, muitala Sara.
Dát lea Sarai dán jagi vuosttas gilvu. Sus leat gilvvus mielde okta heargi báhka-, guokte rabas- ja okta nissonluohkás. Báhka luohkkái son oassálastá Ráidnáin mainna son lea gilvalan jagis 2012 ja mii vuittii diibmá Roavenjárggas.
- Dál lea vehá earálágan gilvu, go diibmá lei áige- ja dán jagi gahčahanvuodjin báhka luohkás. Nissonluohká gollediimmu in leat goassege vuoitán.
Son liiko gilvobáikkis, mii lea Mäntyvaara heastabánas.
- Dat geasuha olu gehččiid, go sáhttet siste geahččat ja guldalit gilvvu. Bánas gal lávejit hárdit dat guokte mohki, go šaddá muhtumin vuoddjái hui gáržin.
Sara mielas hárjehallanbadji lea mannan bures.
- Dán jagi ožžon herggiid ruoktot árabut go diibmá ja bessen álgit hárjehallat árabut. Hearggit leat buori vuoimmis. Šaddá somá oaidnit mo ođđa hearggit birgejit.
Sara lea plánen searvat dán jagi goit World Cup -oassegilvvuide ja Lankojärvi boazocuppai.
- In várra searvva buot boazocup-gilvvuide, go eat beasa searvat gonagasluohkái ja muhtin gilvvut leat nu máilmmi guhkkin.
Sara árvala, ahte dán gilvobajis iežá fales hearggit bohtet leat Ote, Ražan, Tummanopsa ja Burn.
Roavenjárgga boazocup-oassegilvu dollojuvvo Mäntyvaara heastabánas 27.-28.02.2016. Gilvvut álget diibmu 10.45 sihke lávvardaga ja sotnabeaivve.