Árktalaš guovllu nuorat čoahkkanedje dán vahkus Árktalaš dálveriemuide dehege Arctic Winter Games -gilvvuide. Gilvvut dollojuvvojit juohke nuppi jagi ja dán háve Nuuk-gávpogis Ruonáeatnamis.
NRK Sámi dieđuid mielde Sámi joavkkus ledje ivttá beaivvi rádjai čoahkis njeallje golli, golbma silbba ja bronsa dán rádjái gilvvus. Gollemedáljat leat boahtán čuoigamis. Norggabeale sápmelaš Simon Åstot lea vuoitán dán rádjái guokte, Sverre Hansen ovtta ja sámi joavkku ovtta golli.
Sápmi lea mielde nieiddaid juniorluohkás sisspábbačiekčamis ja lea vuoitán eanaš čiekčamiid stuora loguin. Dat vuittii ee. vuosttas spealu Kanada davveoarjeterritoriaid vuostá 10-0 ja nubbi spealu Ruonáeatnama vuostá 5-0. Dát lea juobe hehtten Árktalaš dálveriemuid presideantta.
- Sámenieiddat leat ila buorit spáppa čiekčat ja danne bilidit iežá joavkkuid čiekčanmovtta, oaivvildii Árktalaš dálveriemuid presideanta Jens Brinch NRK Sámi neahttasiidduin. Son ávžžuhii Sámi dieđihit joavkku nieidaluohkkái guovtti jagi geažes.
Sámiid valáštallanlihtu Norgga jođiheaddji Kåre Olli imaštallá Brinch cealkámušaid.
- SVL mearrida ieš geaid dat dieđiha gilvvuide ja mii eat áiggo čuovvulit Brinch ávžžuhusa, dajai Olli NRK Sámi neahttasiidduin.
Sámi valáštallanlihttu sáddii Ruonáeatnamii sullii 40 nuora. Suoma beal Sámis čuoigamiidda leat oassálastán Camilla Korva , Hillá Portti , Antti-Olavi Rytky ja Vilma Rytky Anára Sámisearvvis.
Árktalaš dálveriemuid maŋemus gilvobeaivi lea 11.03.2016.
