Sámemusea Siidas rahpasii ikte Árbi-čájahus, mas guhtta ruoŧasápmelaš duodjeárbevierus bajásšaddan duojára ovdanbuktet dujiideaset.
Árbi-čájáhusa leat buvttadan duojárat Mattias Harr , Hanna Råman , Fredrik Prost , Johanna Njaita , Per-Stefan Idivuoma ja Nils-Johan Labba . Buot guhtta duojára leat vázzan duodjeskuvlla Johkamohkis.
Čájahus lea ovdal lágiduvvon Upmis, Kárašjogas, Áiluovttas, Staares, Árjepluovis, Uppsalas ja Johkamohkis. Dát lea vuosttaš geardi go čájahus dollojuvvo Suoma Sámis.
Čájáhusas duojárat hálidit ovdanbuktit sihke árbevirolaš ja modearna garra ja dipma dujiid dego niibbiid, guvssiid ja vuodjaskáhpuid. Dáinna lágiin sii gudnejahttet duodjeárbevieru, man sii leat ožžon sin máttuin ja čájehit, ahte árbevirolaš duoji sáhttá heivehit ja ovddidit boahtteáigái.
Árbi-čájahus lea ovdan sámemusea Siiddas golggománu 30. beaivvis 2015 gitta ođđajagimánu 24. beaivái 2016.
