Anáris lea gili doaibmiid oktasaš juovllaidrahpan duorastaga, juovlamánu 3. beaivve. Dáhpáhusa álgá diibmu 17.00.
Siida bovde buohkaid doaluide, mat lágiduvvojit Siidda šiljus.
- Doalut leat oaivvilduvvon buohkaide. Siida lea bovden Anára márkana doaibmiid čiŋahit Siidda šilljobirrasa juovlabeziid, muitalit Sámemusea Siiddas.
Iežaset nammajuovlamuoraid čiŋahit ee. Anára beaiveruovttut ja giellabeassi, Anára gielda, Yle Sápmi, Sámearkiiva, Sajos, Anára márkana gilisearvi ja searvegottit.
Doaluid oktavuođas lávlojuvvojit juovlalávlagat ja oassálastiide guossohit sihke sávtta ja bihpporgáhkuid.
- Olbmot ožžot maid ovdanbuktit iežaset prográmma.
Juovllaidrahpandoaluid maŋŋel diibmu 17.30 Sámemusea Siida čoaggá sámiid juovlaárbevieruid. Ulbmilin lea hupmat makkár juovlaárbevierut olbmuid juovllaide gullet ja mo mánnávuođas ávvudedje juovllaid. Dilálašvuođas fállat gáfe.