Dán jagáš Márkomeannu-festivála prográmma lea válmmas. Dán jagi Márkomeannuin loaiddastit earret eará Elle Márjá Eira , Felgen Orkester, Agnete Johnsen , ÁGY, Arvvas, Amoc, Marja Mortensson , Ravggon, Nuoraid Sessions ja Troublemakers.
Festivála rahpanbeaivvi áigge čájehuvvo vuosttas geardde maid Ivar Murberg govvačájáhus. Márkomeannu dieđáhusas muitaluvvo, ahte Murberg (1959-2002) lea márkosámi govvejeaddji geas lei nanu gullevašvuohta Vuopmegeahčái Skániin. Son lei studeren Nordens Fotoskolas Stockholmas.
- Márkomeanus lea guhka leahkán niehku presenteret stuorra vuosehusa Ivar Murbergain, ja dán jagi dáhpáhuvvá, guovda Ivara ja min Sámis. Máŋga portreahta eai leat ovdal oba vuosehuvvon, lea duođas eahpedábálaš govvavuosehus, muitala dieđáhusas festivála buvttadeaddji Susanne Amalie Langstrand-Andersen. Márkomeannu -festivála lágiduvvui vuosttaš háve jagis 1999.
- Márkomeanus mis lea nana vierru fállat olbmuide kultuvrra miehta Sámis, stuorra máŋggaláganvuođain, muitala Langstrand-Andersen.
Langstrad-Andersen muitala, ahte lávdeprogámma lassin festivála ordne maid govvačájáhusaid, diŋgojuvvon buktagiid, klovdnakurssaid mánáide, niehkodulkomiid, smávvakurssaid juoigamis, vázzinmátkkiid ja vuosteceahkkeviehkamiid, sámi sálbmalávlumiid, crossdressenkurssaid ja ságastallamiid dollagáttis.
Festivála dollo Evenáššis Norgga Sámis 28.-30.07.2016.