Jurista Ande Somby muitala Ruoŧa sámeradio jearahallamis, ahte son sávvá, ahte Barack Obama luoittálii Leonard Peltier luovos giddagasas ovdalgo Obama heaitá USA presideantta virggis.
- Lea celkojuvvon, ahte Obama livčče maŋemus olbmuid luoitán luovos. Mus lea goitge vehá doaivu, ahte ammal juo luoittaše, ahte ii geavašii nu ahte álgoálbmogiid Nelson Mandela jápmá butkái, dadjá Somby.
Peltier dubmehalai giddagassii eallinahkái jagis 1977 guovtti FBI-ageantta goddimis, geat jámiiga jagis 1975 indiánareserváhtas dáhpáhuvvan báhčindáistaleamis. Sihke Peltier riektegeavvan ja fáŋgavuohta leat ožžon olu fuomášumi miehtá máilmmi. Amnesty International lea váldán Peltier-dáhpáhusa eahpevuoiggalaš riektegeavvamiid listui.
- Ii lean dieđus gii bázii dán guovtti ageantta, muhto Peltier vuostá biddjojuvvui navdámuš. Maŋŋá leat boahtán gažaldagat, ahte ledjego gielis duođaštusat mat buktojuvvoje dikkis ja man vuoiggalaččat ja riekta Peltier dubmehalai. Áššis ledje máŋggat duođaštusat mat eai livčče dábálaččat doallevaččat, muhto gárte doallevažžan dan dihte, ahte Peltier dubmehallui, dadjá Somby.
Somby atná Leonard Peltier politihkalaš fáŋgan.
- Peltier lei njunnošis indiánaid radikála lihkádusas (AIM). Dan dihte son sáhttá gehččojuvvot politihkalaš fáŋgan ja nu leat maid máŋggat álgoálbmotorganisašuvnnat cealkán.
Ande Somby lea čuvvon 1970-logu rájes Peltier-ášši.
- Jagis 1972 ledje Wounded Knee -dáhpáhusat ja seamma jagis Sirpmás bođii ČSV-doaba ovdan. AIM-lihkadus lei mu mielas seammalágan go ČSV-lihkadus, ahte buot Amerihká indiánat ledje das mielde, dego ČSV:ge, mii lei fokuseren dasa, ahte sápmelaččat leat okta álbmot, son dadjá.
Somby mielas Peltier lea dego álgoálbmogiid Nelson Mandela.
- Seamma láhkai go Mandela, de lea Peltier čohkkan guhká giddagasas. Lea leamaš hui stuorra eahpádus dan lágalašvuođas, ahte man vuođul leaba šaddan čohkkat nu guhká.
Somby jearahallama sáhttá guldalit dáppe:
Toivoo Peltierin vapauttamista
Juristi Ande Somby toivoo Barack Obama vapauttavan Leonard Peltierin vankilasta ennen presidenttiydestä luopumista. Peltier tuomittiin elinkautiseen vuonna 1977 kahden FBI-agentin murhasta. Hänen oikeudenkäyntinsä sekä vankeutensa on saanut paljon huomiota. Amnesty International pitää Peltierin tapausta epäreiluna oikeudenkäyntinä.
- Toivon, että alkuperäiskansojen Mandela ei kuolisi putkaan, sanoo Somby.