Riektediehtagiid doavttir Mattias Åhrena mielas Girjás-duomus lea viidátge mearkkašupmi sámiid rivttiide go dušše čearuid ja boazodoalu dáfus. Váhčira diggerievtti attii gaskavahku duomu, man jelgii Girjása čearru vuittii stáhta eananriekteáššis
- Duomus leat dušše buorit čuovvumušat olles Sápmái, dadjá Åhren SVT Sápmái.
Åhren lei mielde bargame stevdnenohcamuša ovttas RSR:in ja Girjása čearuin. Son lei maid mielde ieš dikkis čearu áššedovdevihtanin mannan giđa. Su mielas duopmu lei sámerivttiid vuoitu.
- Mis leat leamašan iežátge duomut, mat leamašan dehálaččat sámiid riektedáistaleamis. Dát lea goitge iežálágan go dás stevdnejuvvui stáhta oaidnu sámiid rivttiin. Duopmu čájehiige, ahte stáhta oaidnu lei boastut.
Åhren dulko duomu nu, ahte prinsihpalaččat oktage ii sáhtálii boahtit čearu eatnamiidda ilmmá čearu lobi. Son jáhkká, ahte dat nanne čearuid sajádaga dáistaleamis ruvkkiid ja bieggafápmorusttegiid vuostá.
Stáhtas lea golbma vahku áigi váidit duomus. Åhrena oainnu mielde duopmu ii boađe rievdat alimus rievttis, juos nu guhkás váidojuvvo.
- Mus lea nanu jáhku dasa, dannego ášši juridihkka lea goitge oalle oktageardán.
Duomus celkojuvvo, ahte Girjása olbmot leat geavtán čearu eatnamiid nu guhkká, ahte leat ožžon oktorievtti meahcástit ja guolástit doppe.
- Juos dán áigu rievdadit, de stáhta galgá bastit čájehit doaibmabiju, mii válddálii dán rievtti čearus eret ja dasa dat ii gal bastte, oaivvilda Åhren.
Saamelaisoikeuksien voitto
Ihmisoikeusjuristi Mattias Åhrenin näkemyksen mukaan Girjás-tuomio on saamelaisoikeuksien voitto.
- Tässä haastettiin valtion näkemys ja osoitettiin, että se oli väärä.
Åhren on vakuuttunut että tuomio ei muutu korkeimmissa oikeusasteissa, jos sinne asti valitetaan.