AHR ii dutkan Sá­me­dik­ki rah­pančoakká­ma birra dahkkon vái­da­lu­sa

Sámedikki lahttu Anu Avaskari Anáris lea váidán Sámedikki rahpančoakkáma birra alimus hálddahusriektái (AHR). AHR ii goitge dutkan dán váidalusa.

Váidalus guoskkai Sámedikki ságadoalli, várreságadolliid ja stivrra sihke sosiála- ja dearvvášvuohtalávdegotti (sode-lávdegoddi) lahtuid válljema Sámedikki rahpančoakkámis guovvamánus.

Avaskari lei gáibidan váidalusastis, ahte dát ovdalis namuhuvvon Sámedikki válljejumit gomihuvvojit ja Sámediggi mearriduvvo gieđahallat daid ođđasit. Son ákkastalai váidalusastis, ahte stivra ii válljejuvvon bargoortnega mielde, dannego stivra ii ovddas dárbahassii bures Suoma sámiid gielalaš ja guovlulaš joavkkuid.

- Stivrii ii válljejuvvon anárašgiela giellajoavkku ovddasteaddji nuba maid Sámedikki čoakkán ii leat čuvvon ovttaveardásašvuođa iige hálddahuslága buori hálddahusdábi, čállojuvvo váidalusas.

Avaskari ákkastalai maid, ahte Sámedikki bargoortnega jelgii lávdegottiid ságadoallin ja várreságadoallin galgá válljejuvvot Sámedikki aitosaš lahtuid. Sode-lávdegotti ságadoallin válljejuvvon Nihkolas Valkeapää lea Sámedikki várrelahttu, iige aitosaš lahttu.

AHR guođii Avaskari váidalusa dutkatkeahtta daningo Sámedikki ságadoalli, várreságadolliid ja stivrra sihke sode-lávdegotti lahtuid válljemis dahkkon mearrádusaid ii sáhtte atnit hálddahusmearrádussan, masa sáhtálii ohcat rievdadusa váidalusain. AHR mearridii dasa lassin sihkkut eret Sámedikki rahpančoakkáma beavdegirjái paragráfaid 5 §, 7 §, 8 §, 9 § ja 14 § buohta láktojuvvon váidalusčujuhusaid. AHR barggai mearrádusa váidalusa dutkatkeahtta guođđimis 18.07.2016.

Sámediggi gomihii ieš rahpančoakkámis dahkkon sode-lávdegotti ságadoalli válljema dievasčoakkámis 21.06.2016 ja mearridii dahkat seammá čoakkámis válljejumi ođđasit. Ođđa ságadoallin jienastuvvui Veikko Feodoroff ja várreságadoallin Tuomas Aslak Juuso.