Suoma Gurutnuoraid ságadoalli Anni Ahlakorpi moaitá Suoma das, ahte dat ii čuovo ON álgoálbmogiid rivttiid julggaštusa (UNDRIP).
Ahlakorpi válddii Suomi-areena-dáhpáhusas Poris ovdan Giehtaruohttasa Leahttáseanu-guvlui mieđihuvvon málbmaohcanlobi.
- Ohcanlohpi lea mieđihuvvon gulatkeahttá Sámedikki ja báikegotti olbmuid. Váikkuhusat sámekultuvrii eai leat árvvoštallon, vaikke ruvkeláhka dasa geatnegahttá, ohcejohkalaš Ahlakorpi deattuha.
Ahlakorpi ballá, ahte friijagávpesoahpamušat, mat leat ráđđádallon ovttas Kanadain ja USA:in, uhkidit sámiid árbevirolaš ealáhusaid ja sámeguovllu luonddu. Ovdamearkan son lokte dan liibba, ahte olgoriikalaš ruvkefitnodagat vigget deaddit Suoma stáhta vai beasale álkibut ávkkástallat Davvi-Suoma luondduriggodagain.
Ahlakorpi deattuha, ahte Suoma stáhta galggalii čuovvut UNDRIP.
- Suopma lea dohkkehan ON eamiálbmotjulggaštusa ja dan jurdaga, ahte eamiálbmogat cevzet, jos stáhtat čuvvot julggaštusa prinsihpaid. Suopma goittotge guođđá jámma čuovokeahttá julggastuša iige gula eamiálbmogiid, dego julggaštusas gáibiduvvo, son muittuha.
Ahlakorpi moaitá Suoma das, ahte dat ii leat válmmaš čátnašuvvat UNDRIP geavadagaide.
- Dat livčče vealtameahttun eamiálbmogiid ceavzima dáfus. Kultuvrralaš álbmotgoddin ii leat rivttes vástádus sápmelašgažaldahkii, Ahlakorpi dadjá.