Outi Paadar

Sámi filmmat johtet dál miehtá filbmafestiválaid. Okta dain filmmain lea Anssi Kömi ja Suvi West ođđa Juuret on –oanehašfilbma, mii muitala čábbát olbmo ruohttasiid dehálašvuođas, vuolgimis ja ráhkisvuođas guovtti kultuvrra gaskkas.

Olbmuid gaskavuođat leat álo áigeguovdilis fáddá, vaikko kánske sápmelaččat eai hála das almmolaš dásis seamma olu ja viidát go sáhtašii. Danin Kömi ja West filbma leage vuogas, go dat suokkarda dan, maid guimmiid kultuvrralaš duogážat mielddisbuktet báraid gaskavuođaide sámi-suoma konteavsttas.

Kömi ja West leaba deaivvadan dalle go Njuoska bittuid tv-ráiddu ledje ráhkadeamen.

- Mun in diehtán maidige sámi kultuvrras ovdal deiven Suvi ja čuohppagohten Njuoska bittuid, čilge Kömi.

Sudno mielde dat lei buorre vuolggasadji sudno oktasaš eallimii.

Álgojurdda lei ráhkadit filmma Inger-Mari Aikio divttain ja Miro Mantere musihkas. Muhtun oasit dien jurdagis leat mielde ain filmmas, muhto váldoáššin loktana bagadalli Anssi Kömi suokkardallan guoimmis Suvi nana oktavuođa ruoktobáikái Savvonii, Deatnogáddái. Filbma johtáge Helssega ja Vuovdaguoikka gaskka.

- Dán filmmas lea Anssi dat muitaleaddji, ja son lea govven ja čuohppan dán oanehašfilmma, muitala West.

Soai lohkaba ahte dát filbma lea ráhkaduvvon dien áigge go soai vuordigođiiga máná.

- Dalle šaddá smiehttat makkár birrasis háliida máná šaddadit, soai lohkaba measta oktii njálmmiid.

Muhtun muttus filmma Kömi orru gal vehá fuolas go guoibmi lea nu čadnon Sápmái ja smiehtada moson de boahttevuođas geavvá.

- Muhto juste dál munno eallin ja barggut leat Helssegis, lohká West.

Soai leaba guktot ealligovvasuorggi olbmot ja dakkár bárra geat bargaba ovttas.

- Mun lean eanet beroštuvvan sisdoaluin ja Anssis lea teknihkalaš čehppodat, čilge West.

- Mun sáhtán dorvvastit álo Anssii, háleštit suinna ođđa evttohusaid ja prošeavttaid birra, rámida West.

West stuđere Aalto universiteahtas ealligovaid ja lávdelágideami magisttar dásis. Kömi lea bagadan aiddo álgán Paluu Alttarille tv-ráiddu.

Juuret on oanehašfilbma čájehuvvo Tampere filbma festiválas 9.3 ja 10.3.

Mistä on kyse?

Lyhytelokuva juurien tärkeydestä

Anssi Kömi ja Suvi West ovat yhdessä tehneet lyhytelokuvan Juuret on, joka kertoo juurien tärkeydestä, lähtemisestä ja rakkaudesta kahden kulttuurin välissä.

Lyhytelokuva näytetään yhdessä muiden saamelaiselokuvien kanssa Tampereen elokuvajuhlilla 9.3 ja 10.3.


Kirjoita kommentti

Perustele, kirjoita selkeästi, älä vähättele ihmisiä, ÄLÄ HUUDA. Pysy aiheessa ja muista käytöstavat. Kommentit luetaan ja tarvittaessa muokataan ennen julkaisua.

Meillä on nollatoleranssi alatyyliselle ilmaisulle, henkilöön käyvälle arvostelulle ja vihamielisyydelle. Emme julkaise kommentteja, joiden ainoa sisältö on negatiivinen mielipide vailla perusteluja. Jätämme julkaisematta myös ne kommentit, joissa ei lainkaan piitata oikeinkirjoituksesta kuten isoista alkukirjaimista tai välilyönneistä.

Kiitos etukäteen rakentavasta kommentistasi!

Lue myös