Neakkel bálggus juohkášuvvá, sámiid bealli vuittii jienastusa

Neakkel bálges juhkkojuvvo guovtti oassái, nugo sámi boazodoallit ledje sávvan. Bálgesa dievasčoakkámis stivrra árvalus vuittii jienaiguin 5344-2762.

Bálgesjuohkima duohkin leat riiddut guohtoneatnamiin. Lullioasi boazodoallit ákkastallet davás viggama, go sis lea heittogis guohtun. Juohkinmearrádusa mieđuštedjege sierra oaivilat.

Sámiid bealde fas dadjet, ahte lulliosiin leat guorba eatnamat eaige doppe máhte daid fuolahit. Neakkela juohkimis guovtti bálgesa rádji boađalii Heahttá-Njunnás -geainnu davabeale luoddaguora.

Čoakkáma beavdegirjji dárkkisteami maŋŋa mearrádusas lea ain mánotbaji váidináigi. Go bálgesa čoakkáma mearrádus áiggi mielde fidne láhkafámu, de stivra sáhttá ohcat lobi bálgesa juohkimii.

Dan oktavuođas rájit čielggaduvvojit dárkilit ja sohppo bálgesa guohtoneatnamiid juohkimis. Dan mannjá go visot áššit leat šihttojuvvon, de stivra sáhttá ohcat lobi juohkimii.

Loahpalaččat de guovlohálddahusdoaimmahat AVI mearrida bálgesa juohkimis.

Áitaleamit sámiid vuostá

Bálgesčoakkámis gulloje garrage sáhkavuorut omd. das, gii lea sápmelaš. Sámedikki ságadoalli ja Neakkel bálgesa lahttu Klemetti Näkkäläjärvi muitalii, ahte sámiid leat juobe áitalan veahkaválddiin.

Juvvá Lemeha mielde sámediggi ii leat váldán virggálaččat beali bálgesjuohkimii. Son goit jáhkká, ahte sámediggi doarju sámi boazodoalu suodjaleami lulleboazodoalliid vuostá.

Neahkkel orohaga stivrra bargun lea ain ovddidit bálgesjuohkima.

Stivrras leat ovdaolmmožin Hannu Ranta, várresj:n Esa Kumpulainen, eará lahttun Jouni Näkkäläjärvi, Iisko Ruotsala, Teuvo Kuru ja Isak O. Näkkäläjärvi.