Lávdegoddi čoahkkana juohkit Sámiráđi kulturdoarjagiid
- .
Sámiráđi kulturlávdegoddi čoahkkana dán vahkuloahpas Romssas. Deháleamos áššin čoahkkimis lea juohkit jagi 2012 kulturdoarjagiid.
Dán jahkái kulturdoarjja juolluduvvo oktiibuot 180 000 €. Bargostipenddat juhkkojit golbma, guđetge 20 000 €. Dasto báhcá projevttaide vel 120 000 €, go ohcamusat (67 st) leat boahtán oktii buot 518 591 € ovddas.
Sámiráđi kulturdoarjaga ulbmilin lea oppalohkái doarjut ja ealáskahttit sámiid kultureallima ovttasbarggu riikkarájáid rastá ja ovddidit doaimmaid, maidda sámiin lea oktasaš beroštupmi.
Doarjjaruhta sámi olbmuide ja servviide
Sámiráđi kulturdoarjaga sáhttet ohcat sápmelaččat, sámi searvvit ja joavkkut.
– Bargostipenddat leat oaivvilduvvon aktiivvalaš kulturbargiide. Jagi 2012 stipeanddaide ohcamušat leat boahtán 42 stuhka. Ohcciid mearri lassána jagis jahkái, diibmá ohce 33 kulturbargi bargostipendda, muitala Leena Aikio Sámiráđi kulturossodagas.
– Projektadoarjja lea oaivvilduvvon ovddemustá projevttaide, mat gusket unnimustá guovtti riikii, gos sámit asset. Ohcamušat leat máŋggaláganat ja dávjá okta ohcamuš gokčá máŋgga kultur- dahje dáiddasuorggi doaimmaid. Maiddái jahkásaš dáhpáhusaide nugo festivalaide ja diekkáriidda ohcco doarjja.
– Sámiráđi kulturdoarjjaortnet leamaš fámus juo 1980 logu rájes. Doarjjaortnega dahká vejolažžan Davviriikkaid ministtarráđi juolludan ruhta.
– Maiddái kulturdoarjaga hálddašeapmái ja kulturossodaga doaibmaruhta boahtá Ministtaráđis nugo oassi Sámiráđi almmolaš doaimma ruhtadeamisge, kulturčálli Leena Aikio lohká.
Kulturlávdegottis 5 lahtu
i
Sámiráđi kulturlávdegoddái gullet vihtta lahtu, okta lahttu iešguhtege riikkas ja viđát lahttun Sámiráđi ovddasteaddji.
Kulturlávdegotti jođiheaddjin dál lea Kristin Solberg ja várrejođiheaddjin Niko Valkeapää.
Sámiráđi kulturlávdegotti čoahkkin lea bovdejuvvon Norgga beale Romsii, ja čoahkkinbeaivvit leat 25.-26.2.2012.
Gáldu: Sámirađi kulturossodat
