Suoma heargecup álgá dán vahkuloahpa Roavenjárggas
- Ordnejeaddjit sávvet buori dálkki boahtte vahkuloahpa Roavvenjárgga heargecupgilvvuide. Govven Markku Leskinen
Dán jagi vuosttaš Suoma heargecupgilvu dollo 25.-26.2.2012 Roavvenjárggas Mäntyvaara doalvegeidnosis.
Heargegilvvut lágiduvvojit Roavvenjárggas dál 11. geardde. Álggus gilvvuid lágide Kemijoki nalde, muhto fárreje moadde jagi áigi Mäntyvaarai, gos lea suodji olbmuide ja buoret oainnus.
Okta gilvvuid lágideddjiin Veikko Hiukka muitala, ahte gilvvuide leat almmuhan juo oktiibuot badjel 150 hearggi, muhto vuordá vel eanet almmuhusaid.
– Odne eahkes mii álgit ordnet stadiovnna ja šalket vuojáhaga. Hástalussan lea muohtavallji ja dieđusge oažžut olbmuid loaktit báikki alde.
Diibmá ledje unnán vuoddjit herggiide. Šattaimet ordnet eanet vuolgagiid, vai baste vuodjit buot herggiiguin, maid ledje ovddalgihtii almmuhan . Sávvamis dán jagi dilli lea buoret, muitala Hiukka.
Dán jagi ordnejit maid bussesáhtu ovdal gilvvuid gávppotguovddáža hoteallain Mäntyvaara stadionii ja ruoktot mannjel gilvvuid.
Vel geargá searvat
Gilvvuide galgá almmuhit odne 20.02.2012 ovdal diibmu 16.00.
Norggabeale ja ruoŧabeale gilvaleaddjit galget almmuhit iežaset šleađgapoasttain.
Almmuhandieđut: šleađgapoasta: erkki.orre@pp.inet.fi / tlf. +35816 310544 dahje +358 400 239 315
Iežát dán jagáš heargecupoassegilvvut leat Luostos 2.-3.02 , Ämmänsaaris 10.-11.03, Lankojärvis 17.-18.03 ja Yli-IIs 24.-25.03.
Heargegilvvut jukset loahpagealddu heargegonagasgilvvuin 31.03.-01.04 Anáris.
