Ministeriija ásahan bargojoavku ráhkkanahttá gieldaođastusa

Virgeolbmuin čohkkejun bargojoavku dutkagoahtá Suoma gieldaráhkadagaid ođastusa. Stáhtaruhtaministeriija ásahan bargojoavku čuovvu ja árvvoštallá árvaluvvon gieldaráhkadagaid nuppástusa. Vuođđun dán barggus lea álggahuvvon viiddis gulaskuddan, mii dán giđa čáđáhuvvo miehtá riikka.

Suoma ruhtaministeriija lea gieskat almmuhan ođđa gieldajuohkoárvalusa, man mielde olles Supmii bázašedje váile 70 gieldda dálá sullii 330 suohkana sajes.

Sámis ovttastuhtašedje Anára ja Ohcejoga stuorgieldan, masa boađašii bihttá vel Vuohču birrasis Soađegili gieldda davvioasis. Eanodat bealistis náitošii oktii Gihtteliin, Muonain ja Kolariin.

Sámis goasii buohkat lea gieldajuohkoárvalusa vuostá. Dušše soames olgešpoltitihkarat leat láivvet dorjon iežaset bellodaga gieldaministara evttohusaid.

Gulaskuddama bohtosat stivrejit joatkima

Gieldaráhkadatlága válmmaštalli bargojoavku berrege guorahallat dán giđa gulaskuddamis fidnejuvvon máhcahaga ja čohkket das oktiigeasu. Bargun lea maid vihkket árvaluvvon ođastusa váikkuhusaid ja gárvvistit dárkilis evttohusa gieldaođastusa ollašuhttimis.

Gulaskuddama maŋŋá Suoma ráđđehus linjáda gieldaođastus joatkima. Ráhkadatnuppástusa stivrrejeaddji lága sisdoallu maid šaddá mearuštuvvot. Dát sisdoallá erenomážit nana gieldda kriteraid ja ollašuhttinvuogi.

Riikka ráđđehusa linnjágeassimiid vuođul de bargojoavku berre hábmet árvalusa láhkan gieldaráhkadagas.

Bargojoavkkus dušše virgeolbmot

Hálddahus- ja gieldaministtar Henna Virkkunen lea 15.2.2012 ásahan bargojoavkku válbmet gieldaráhkadatlága. Bargojoavkku doaibmaáigodat nohká 30.9.2012. Bargojoavkku jođiheaddji lea allahoavda Päivi Laajala stáhtaruhtaministeriija gielda- ja guovlohálddahusossodagas.

Bargojoavkku lahttun leat hálddahusráđđeolmmoš Auli Valli-Lintu, ovddidanhopavda Arto Koski ja alladárkkisteaddji Ville Salonen stáhtaruhtaministeriija gielda- ja guovlohálddahusossodagas. Eará lahtut leat šiehtadalli virgeolmmái Juha Majanen ruhtaministeriija budjeahttaossodagas, ovddidanhoavda Markku Suksi vuoigtavuohtaministeriijas, hoavda Kirsi Kangaspunta oahpahus- ja kulturiministeriijas, halddahusráđđi Päivi Salo sosiála- ja dearvvasvuohtaministeriijas, allahoavda Heikki Aurasmaa bargo- ja ealáhusministeriijas ja vel huksenráđđi Matti Vatilo birasministeriijas.

Ráđđádalli virgeolmmoš Inga Nyholm ruhtaministeriijas lea bargojoavkku bissovaš áššedovdi. Bargojoavkku čállin doibmet láhkaásahanráđđi Eeva Mäenpää, alladárkkisteaddjit Anu Hernesmaa ja Markku Mölläri stáhtaruhtaministeriija gielda- ja guovlohálddahusossodagas.

Dárkkuhus lea, ahte láhka gieldaráhkadagas boađašii fápmui jagi 2013 álggus.

Gáldu: Suoma stáhtaruhtaministeriija