Golmmagielat Unna Junná hásttuha fas sámemánáid TV geahččat

Sámi mánáid Unna Junná ihtá fas Suoma televišuvdnii. Golmma sámegillii buvttaduvvon mánáid-TV sáddegoahtá ođđa programmaid dán vahko sotnabeaivve.

Dán giđa Unna Junnás sáhttá oaidnit ee. boazobeatnagiid vielpáid, beassat musihkkamátkái, dutkat luottaid, málestit, geahččalit birget seavdnjadasas ja riessut liinni, muitala doaimmaheaddji-buvttadeaddji Ritva Torikka YLE sámeradios Anáris.

– Mánát leat maiddái ieža gárvvistan osiid giđa programmaide sierra bargobájiin, maid leat ordnen ovttas skuvllaiguin ja sámedikki Skábma-filbmaguovddážiin.

Ovddeš jođiheaddjit jotket

Unna Junná -prográmmaid jođiheaddjin jotket eanaš ovddežis oahpes olbmot:

Irene Länsman lea bargan Unna Junnás jagi 2008 rájes. Son lea ovdal leamaš mielde teáhteris ja maiddái ealligovain.

Heli Huovinen lea eret Goahppilis. Heli lea gazzan teahteroahpu Kokkolas. Son lea bargan ee. Sámi Radios Anáraš saavain ja golmmagielat mánáidradios, Binna Bánnas ja leamašan teáhterbarggus. Heli giella lea anárašgiella.

Niillas Holmberg lea eret Ohcejogas ja lea vázzán Tamperes logahaga, gos lea oahppan teáhtera ja dáidaga. Son lea leamaš soames filbmarollain ja bargan maiddái teáhteris. Niillas lea almmostuhttán jahki dás ovdal ”Ima hutkosat”-mánáidskearru ovttas ohcejohkalaš Hilda Länsmaniin ja iežas ”Manin guottán girjji fárus-skearru mannán čavčča. Niillas lea davvesámegielat.

Anna Näkkäläjärvi-Länsman lea Sibelius-akatemiijas válmmaštuvvan musihkkár. Son lea bargan Sámedikki musihkkaguovddážis ja máŋggaid jagiid mánáiguin sierralágan proševttain. Son maid oahpaha musihka. Annas lea mannán čavčča almmustuvvan Ánnámáret Ensemble -joavkkuin skearru ”Beallječiŋat”. Anna dahká musihka Unna Junnái.

Anna-Katariina Feodoroff, Aka (17 j.), lea eret Čeavetjávrris. Son vázzá Avvila logahaga. Su eallimis leat dehálaččat bohccot ja boazodoallu. Son liiko maiddái čállit ja sárgut. Aka jođiha Unna Junná nuortalašgillii ovttas Leena Fofonoffiin, (17 j.) Leena lea maid eret Čeavetjávrris ja son maid liiko čállimis. Leena vázzá Roavvenjárgga ámmátlogahaga. Earet čállimii Leena liiko láibumii ja lohkamii.

Unna Junná dán giđa

YLE sáddegoahtá Unna Junná -mánáid-TV giđa 2012 programmaid sotnabeaivve guovvamánu 19. beaivve. Giđa áigge bohtet oktii buot 15 prográmma Unna Junná -ráiddus.

Sáddenáiggit leat sotnabeivviid dmu 7.45 TV-2:žis ja fas dmu 8.15 FST5:ža bealde.

Giđa maŋimuš programma boahtá olggos 27.5. Unna Junná -prográmmaid joatkašuvvamis čakčat ii leat velá diehtu, go ruhtadeapmi lea ain rabas.

Unna Junná -mánáidprográmmat buvttaduvvojit eanaš olgun, go Anáris ii leat dál studio anus. Nuppe dáfus olgun buvttadeapmi orruge sámiide oalle lunddolaš, lohká Ritva Torikka.