Olgguštuvvon mapuchet gáhttejit árbevieruideaset Chilés
- Oainnus mapuche-indiánaid árbeviesus, rukas. Dátge lea oaidnimis Siida-sámemuseas 18.2.2012 rájes ovddos gitta miessemánnui. Govva Siida-sámemuseas.
Lulli-Amerihká Chilé eamiorrut, mapuchet leat gillán vealaheami 1500-logu rájes, go espánjalaččat bahkkejedje álgoássiid eatnamiidda. Vuolušteamis fuolakeahttá mapuchet ain leat seailluhan iežaset giela ja vieruid. Dán duođašta maid Mapuche - Chilé ealli ruohttasat -čájáhus, mii dál rahppo Siida-sámemuseas Anár márkanis.
Birrasii 300 jagi doarrumiid maŋŋá vilges olbmot vuoluštedje dálá Chilé ja Argentiinna guovlluid álgoálbmoga loahpalaččat 1800-logu loahpas. Chilé stáhtta válddii mapucheid eatnamiid. Ná sin vuorbi leai seammasullasaš go earáge eamiálbmogiin Amerihká nannamiin.
Dál Chilé bealde gávdnojit árvvu mielde 600000 mapucheolbmo ja sullii miljonbealli Argentiinna bealde. Vuovdečuohppamat, čáhcefápmofidnut ja ruvkedoaibma gáržžedit mapucheálbmoga eallinsaji. Álbmot gillá ain olggušteamis, geafivuođas ja sosiála váttisvuođain.
Mapuchet leat goit figgan gáhttet iežaset giela, mapunduŋggu ja maid virolaš kultuvrraset.
Mapuche - Chilé ealli ruohttasat -čájáhusas leat ovdan arkeologalaš diŋggat, tekstiillat, silbačiŋat, árgabeaivve dávvirat ja šamanismii gullevaš biergasat. Čájáhus lea rabas Siida-sámemuseas 18.2.-1.5.2012.
Čájáhusa lea buvttadan Chilé ovdakolumbuslaš áiggi musea (Musea Chileno de Arte Precolombino). Čájáhus lea ovdal johtán ee. Kolumbias, Kiinnás ja Polskkas. Chilé ambassáda doarju johtti čájáhusa Suomas.
Galdu: Siida-sámemusea ja Internet
