Sámedikki áirasat ráhkkanedje semináras vuosttaš čoaggámii Anáris
- Sámiid kulturviessu, Sajos, vuordá alla gussiid rahpandoaluide Anáris.
Eanas áirasat ođđa sámedikkis ledje mielde semináras, mii lágiduvvui disttaga Anáris. Seminárá ulbmilin lei dahkat dikki doaimma oahpisin váljejuvvon áirasiidda. Seminára fáddan lei sámedikki doaibmavuogádat ja sámiid sajádat dálá Suomas.
Semináras ledje mielde goit 16 áirasa sámedikkis, man doaibmaáigodat lea 2012-2015. Seminára rabai hálddahushoavda Juha Guttorm ja son muitalii maid sámedikki historjjás.
Sámedikki láhkačálli Aimo Guttorm guoskkahalai sámedikki sajádaga ja politihkalaš váikkuhanvejolašvuođaid Suomas.
Sámedikki geavatlaš vuogádagaid čilgii Hilkka Kukkonen. Sámedikki sierra hálddahussurggiid ovddasteaddjit muitale dárkkebut guđege suorggi doaibmageavahagain. Seminára loahpas lei vel ságastallan.
Ovdal ođđa sámedikki vuosttaščoaggáma de eahkes ledje vel eahppevirggálaš šiehtadallamat ságajođiheaddji váljemis, mii leage okta váldoáššiin ortniiduvvamis gaskavahko.
Sii dat váljjejit sámedikki njunnoža
Sámediggái leat válljejuvvon 21 áirasa ja sidjiide 4 várrelahtu mannan čávčča válggain. Fásta áirasiid duohken de leage, gii beassá ođđa sámedikki ollesáigásaš ságadoallin.
Sámedikki 21 fásta áirasa leat:
Eanodagas:
Näkkäläjärvi Heikki Klemetti
Valkeapää Johan Nihkolas
Magga Ellen Ulla–Maarit
Anáris:
Sanila- Aikio Tiina Juulia
Haltta Tauno
Avaskari Anu
Soađegilis:
Äärelä Rauni Irja Anneli
Magga-Vars Petra Biret
Hetta Jouko Iisakki
Ohcejogas:
Nuorgam Mirva Anne Marjatta
Tapiola Nilla Samuli
Länsman Asko Tapani
Jietnameari vuođul:
Pohjanrinne Arto Juhani
Paltto Heikki Yrjänä
Guttorm Veikko Armas Johannes
Tapiola Jouni Ilmari
Heikkuri Pertti Olavi
Näkkäläjärvi Pirita Susanna
Morottaja Anna Margareeta
Valle Pentti Viljo Heikki
Musta Yrjö Oskari
