Gieldaođastusa gulaskuddančoahkkin Roavvenjárggas dán mánu loahpas
- Gieldaministtar Henna Virkkunen. Govven Pekka Aho.
Sámi gielddainge lea vejolaš buktit ovdan oainnuideaset evttohuvvon gieldaođastusas Roavvenjárggas dán mánu loahpas. Lappi gielddaide lea várrejuvvon muhtin minuhta sáhkavuorru gulaskuddančoahkkimis, man Suoma stáhtaruhtaministeriija lágida 27. 2. Roavvenjárggas.
Stáhtaruhtaministeriija ordnen gulaskuddanseminárat miehtá riikka leat dilálašvuođat, maidda leat bovdejuvvon ovddemustá gielddaid ovddasteaddjit ja Suoma gieldalihtu ovddasteaddjit. Bovdejuvvon lágádusaide gullet maiddái eatnangottiid lihtut ja buohccedikšunbiret.
Earát bovdejuvvon servošat leat spesiálafuolahusbiret, ovttasbargoguovllut, oahpahusa gieldaovttastumit, guovlohálddahusdoaimmahagat, ealáhus- johtalus- ja birasguovddážat, bismagotti, nuoraidstivrraid váldolihttu, guovlluid fitnodatorgánat, gávpekámmárat ja bárgomárkaniid guovddášsearvvit.
Gulaskuddan álgá Davvi-Gárjilis
Árvaluvvon gieldaođastusa guovlogulaskuddan álgá Davvi-Gárgjilis aiddo guovvamánu 14. beaivve. Suoma riikkaviidosaš gulaskuddančoahkkimat bistet njukčámánu beallemutto badjel.
Stáhtaruhtaministeriija gieldaossodat doallá oktii buot 18 gullanseminára sierra eatnangottiin miehtá Suoma. Čoahkkaneamit bistet beaivelahki, ja dat leat oassi sierra oassebeliid gullamis. Gulaskuddan čađahuvvo maiddái čálalaččat ministeriija virgebargojoavkku gieskat ovdanbuktin gieldaođastusas.
Lappi gieldaođastusseminára lea 27.2. dmu 12-16.30 Lappi universiteahta Fellman-sáles Roavvenjárggas. Iešguđet Sami gildii lea várrejuvvon sullii 4 minuhta sáhkavuorru ságastallamis.
Diehtojuohkin gullama oktavuođas
Juohke eatnangotti gullandilalašvuođaid oktavuođas stáhtaruhtaministeriija gielda- ja guovlohálddahusovttadat lágida maid diehtojuohkima mediaovddasteaddjiide. Gieldaministtar Henna Virkkunen oktan virgeolbmuiguin vástida gažaldagaide.
