Ministeriija ákkastallá Sámi luddema johtinoktavuođaid váilumiin
- Heajos doares johtolagat Sámis leat ministeriijas oktan ággan dasa, ahte Eanodat bázalii olggos árvaluvvon sámegielddas.
Suoma stáhtaruhtaministeriijas ákkastallet Eanodaga sirrema Sámis maiddái doares johtinoktavuođaid váilumiin. Nubbin vuođuštussan Eanodaga čatnamii Oarje-Lappii bukto ovdan ovddeš ovttasbargu dien guvlui.
Suomas gieldaođastusa čielggadus ja árvalusat leat gohccáhan láitámušaid sámepolitihkáriidge bealde. Stáhtaráđi virgeolmmošbargojoavkku evttohusas Eanodat oainnat bázašii ođđa ”sámegieldda” olggobeallái.
Gieldaođastusa čielggadeami mielde Eanodat báicce laktojuvvošii stuorra suohkanii, mas dálá gielddain mielde livčče maiddái Muona, Gihttel ja Kolari.
Heajos johtinoktavuođat doarrás leatge oktan sivvan Eanodaga sirremii eará Sámis. Dán duođašta hálddahusráđđeolmmoš Auli Valli-Lintu Suoma ruhtaministeriija gielda- ja guovlohálddahusovttadagas.
Valli-Lintu vuođušta Eanodaga ovttasteami Oarje-Lappi stuorra gildii maid dainna, ahte Eanodagas ovddežis leat oktavuođat diehko guvlui.
Gieldaráhkadagaid divvun ovddemusas
Valli-Lintu deattuha, ahte varas čielggadeamis lea gážaldat ovddemustá gieldaráhkadagaid ođadeamis, vai vuođđobálvalusaid bastet dáhkidit boahttevuođas.
– Juos eat hálit sakka vuolidit vuođđobálusaid dási, de gieldasuorggis ferte juoga dahkkot. Omd. Eanodaga veahkaráhkadaga einnostus ii leat buorre, son dadjá.
– Vaikko jearaldat lea namalassii gieldaráhkadagaid divvumis, de dán oktavuođas lea gal bukton ovdan sámegiela doarjjadárbu. Sámi giellalága vejolaš nuppástuhttin gáibida de šiehtadallamiid sámedikkiinge, muittuha Valli-Lintu.
Vuohču lavttaguovllu viidodat rabas
Man viidát Soađegili Sápmi laktojuvvošii evttohuvvon ođđa sámegildii? Dán gažaldaga guođđa ollásit rabasin gieskat Suomas almmustuhtton gieldačielggadus.
Árvalusa mielde ođđa gieldda vuođđun Sámis livčče Anár ja Ohcejohka, maidda vel laktojuvvošii Vuohču guovlu Davvi-Soađegilis. Čielggadus ii namut maidege lavttaguovllu viidodagas.
– Gielddaid oasselaktimat gáibidit dárkkes guorahallama, go ášši ovdána ollašuhttima rádjái, juoba giddesopmodagaid rájit váldojit vuhtii, lohká Valli-Lintu .
– Vuohču guovllu vejolaš laktimis Anár-Ohcejohkii berre dárkkebut gullat maiddái gielddaid ja šiehtadallat vuđolaččat visot oassebeliiguin, son dadjá.
– Gieldda oasi laktima nuppi gildii šaddet čilget giddehagaid dárkilvuođain, nanne hálddahusráđđi Valli-Lintu.
Das lea dakkaras varalasvuohta, ahte jus Eanodat bazasii eret samiid ruovttuguovllus, de leat buktimen ruvkkiid ja eanet aht eanet turismma Eanodahkii. Galgage hui varrugas. Geanson intressa dat livccii? Varra stahta goittotge, muhto leazzago maiddai gieldda.
Ilmoita asiaton kommentti