Soađegilis duhtavaččat vaikko gielda sáhttá unnut
- Gielddahoavda Viljo Pesonen dohkkeha oallemuddui gieldabargojoavkku árvalusaid, muhto ii mielas attalii gieldda davviosiin maidege eret. Dan birra son vuordage ságastallama. Govven Paula Hakala.
Soađegili gielddahoavda Viljo Pesonen lohká iežas leat oalle duhtavaš dasa, go gielda seaillošii goasii ovddeš rájáiguin. Son mieđeha gal, ahte ráđđehusa čielggadanjoavkku árvalan Vuohču guovllu vejolaš manaheapmi ii leat vuogas árvalus.
– Mii leat ságastan ovdal áššis ja gávnnahan, ahte Vuohčču lea árbevirolaččat gullan Soabbada guvlui Soađegili bealde, vaikko dat leage gillin nuorra, Pesonen muitala.
– Ferte gal dovddastit, ahte dálá áiggis Vuohcu guovlu dorvvasta bargosajiin nannosit Suoločielggi turismaguovddážii, mii lea Anár gieldda bealde. Čoavddaášši lea, man viidát Vuohču birasguovlu laktojuvvošii ođđa davvegildii.
– Ollislaččat Vuohčuguovllu manaheapmi ii dattetge leat stuorra ášši goittotge olmmošlogu ektui. Soađegili mannan jage loahpa ássilohku lei 8821, das ii muhtin čuođi geahppáneapmi dovdo hirbmadit.
– Dasa lassin Soađegili olmmošlogu einnostit badjánit 3 jagi siste lagabui duháhiin, go deike leat boahtimin ođđaássit omd. ruvkeadoaimma ovdáneami dihte, Pesonen govvida gieldda dili.
– Sámi gielddaruđain ii stuorra rolla
Soađegilli lea fidnen sámegielddain eanemus lasseruhtadeami stáhtas giellabálvalusaide, go sámegiellaruđat juhkkojit olmmošlogu vuođul. Olles bušeahtas diein ruđain ii leat goit stuorrage mearkkašupmi, Pesonen lohká.
– Oppalaččat dohkkehan gal dan, ahte juoga lea bággu dahkat gieldasuorgái, vai bastá boahttevuođas fuolahit bálvalusaid buohkaide, Soađegili gielddahovda Pesonen lohká.
Pesonen vel lasiha, ahte dán mánu loahpas lea Roavvenjárggas Lappi gielddaid gullančoahkkin, gos juohke suohkana ovddasteaddjis lea vejolaš doallat 4 minuhta sáhkavuoru.
