Sámegielddat bissot várra iehčanassan Suoma ráđđehusa plánas

Bissotgo Sámi gielddat Anár, Eanodat, Ohcejohka ja Soađegilli iehčanassan? Diet gažaldat oažžu lassečilgehusa odne, go Suoma ráđđehusa gieldaministtar Henna Virkkunen (olg.) ovdanbuktá diibmu 11 gieldaráhkadaga suokkardan bargojoavkku árvalusa.

Gieldaministara diehtojuohkinčoahkkin lea dange beales earenoamáš, ahte dat oidno njuolggo neahttainfon Suoma stáhtaráđi siidduin www.valtioneuvosto.fi. Das muitalit maidddái eatnangottiid gulaskuddamiin vuolggahahtti gieldakárttaid.

Suoma ráđđehus lea nannosit háliideamin gielddaid geahpedeami, vai omd. sosiálabálvalusaid fállamii livčče doarvái nana vuođđu. Gieldaođastusas lea máinnášupmi maid mannan jage vuođđuduvvon ráđđehusa prográmmas.

Leana gielddain eanetgo bealli jávkámin

Suomen Kuvalehti -áigečála lea ovdal muitalan, ahte Lappi eatnangoddái báhcet ministeriija plána mielde dušše logi gieldda dálá 21 suohkana sadjái. Áigečállágii suođđan kártta vuođul sámeguovllu njeallje gieldda goit bisošet iehčanassan nugo dál.

Leana gielddain oktiináitojit dát, juos plána álgomuttu plána ollašuvvá:

• Giepma, Giemaeana, Simo ja Tervola

• Duortnus, Badjeduortnus ja Pello

• Gihttel, Kolari ja Muonaniski

• Roavvenjárga ja Ranua

• Giemajávri, Pelkosnjárga, Sállan ja Savuguoika

• Boaššu ja Guossán (dát gullá Davvi-Davvebađaeatnama beallái).

Iehčanassan de seaillošedje sámeguovllu gielddat: Eanodat, Anár,Soađegilli ja Ohcejohka.