Lasi návddiid bivdolobit árvaluvvojit boazodoalloguvlui
- Dutkiid mielde Suomas leat 150-165 návddi ja boazodoalloguovllus 20-25 návddi.
Návddiid bivdoeriid evttohit lasihit Suoma boazodoalloguovllus. Eana- ja vuovdedoalloministeriija leage vuolggahan gulaskuddamii árvalusa láhkaásahussan, man mielde bivdoearri sisdoalašii goddinlobi 18 návdái dán jagi.
Jos láhkaásahus dohkkehuvvo riikkabeivviin, de Suoma fuođđoguovddáš sáhtašii addit spiehkastatlobiid eanemustá 18 návddi goddimii boazodoalloguovllus.
Lassebivdoeari ággan lea spiredutkiid varas árvvoštallan, man mielde Suomas leat dál eanet návddit go diibmá. Meahccenávddit leat maid dagahan dovdomas vahágiid boazodoalloguovllus.
Eana- ja vuovdedoalloministeriija ásahusa vuođuštusaid duohken leat fuođđo- ja guolledutkanlágádusa FGDL meahcce- ja čáhcevaljiid dutkiid čoaggin dieđut.
Dutkiid mielde Suomas leat dál 150-165 návddi ja boazodoalloguovllus 20-25 návddi. Ministeriija jáhkká, ahte dán giđa ja geasi áigge boazodoalloguvlui bohtet vel lasi nuorra návddit Ruoššas ja Kainuu-eatnangottis.
Varas árvvoštallama vuođul návddit dagahedje birrasii miljon euro vahágiid boazodollui diibmá.
Boazoisit doarju evttohusa
Muotkeduoddara boazoisit Tarmo Lietoff lohká, ahte lea buorre, go návddiid bivdolobiid áigot lasihit namalassii boazodoaloguovllus.
- Dán dálvve návddit leat speadjan mihá eanet bohccuid go diibmá. Juos dilli lea boahteáiggis seamma vearrái, de delle livččii dárbu ohcat lasi bivdolobiid.
Muotkeduoddaris leat dán jagi gaidnadan ovtta návddi spiehkastatlobiin. Bálggus lea ohcan maid nuppi bivdolobi, muhto lohpemearri lea juo dievvan olles Suomas dán jahkái.
7.23 oo piippahattu hiljaa,ei teidän piipitystä jaksa enään kuulella!
Ilmoita asiaton kommentti