Niinistö vuittii sámegielddainge
- Sauli Niinistö lea Suoma 12. presideanta. Son vuittii presideantaválgga nuppi vuoru, mii nogai sotnabeaivve.
Olgešbellodaga evttohas Sauli Niinistö vuittii presideanttaválggaid nuppi jorrosa. Niinistö oaččui riikkaviidosaččat 62,7 % jienain ja Pekka Haavisto fas 37,3 % jienain. Jienastanproseanta lei riikkaviidosaččat 68,9%. Láivves jienastanmoktii váikkuhii garra buolaš.
Lappi leanas eanetlohku jienastedjiin guottihedje Niinistö. Dušše Kolari gielddas Haavisto čokkii eanet jienaid.
Sámi gielddain Anáris jienastanproseanta lei 60,1%, doppe Haavisto oaččui 38,7% - ja Niinistö 61,3% jienain.
Enodagas jienastanproseanta lei 62,8%, doppe Haavisto oaččui 31%- ja Niinistö 69% jienain.
Ohcejogas jienastanproseanta lei 64,1%, doppe Haavisto oaččui 37,3%- ja Niinistö 62,7% jienain.
Soađegilis jienastanproseanta lei 60,8%, doppe Haavisto oaččui 30,4%- ja Niinistö 69,6% jienain.
Niinistö lea vuosttaš olgešbellodaga presideanta 56 jahkái.
