Sámedikki jođiheaddjigilvvus guokte njunuševttohasa
- Klemetti Näkkäläjärvi ja Tiina Sanila-Aikio gilvaleaba sámedikki ságadoalli doaimmas. Govvabárra LK arkiivvas
Ođđa sámedikki ságajođiheaddji doibmii leat guokte njunuševttohasa. Sámiid parlameantta jođiheaddji válljejuvvo sámedikki vuosttas čoahkkimis guovvamánu beallemuttus Anáris.
Njunuševttohassan sámedikki jođiheaddjin orrot leamin mannan čavčča válggain ”jietnadronnet” Tiina Sanila-Aikio ja sámedikki ovddit áigodaga ságajođiheaddji Klemetti Näkkäläjärvi. Soaihan dat čokkiiga eanemus jienaid sámiid almmolaš válggain čakčat 2011.
Lapin Kansa aviissa čohkken dieđuid vuođul leage vejolaš, ahte sámediggi fidne dál vuosttas geardde nuortalaš ságajođiheaddji.
Ovddeš sámeparlameantta áigge ságajođiheaddjin leat gal leamaš unnitlogu sámiid ovddasteaddjit nugomat nuortalaš Matti Sverloff ja anáraš Matti Morottaja.
Lapin Kansa lea jearran ođđa sámediggái válljejuvvon áirasiin, gean sii oidet boahttevaš ságajođheaddji válljemis. Sámedikki lahtut besse muitalit oaiviliiddiset namahaga.
Guovtti evttohasas nana doarjja
LK jearahan áirasiin čiežas ledje dan mielas, ahte mannan čávčča sámeválggain eanemus jienaid čoaggán Tiina Sanila-Aikio livččii vuogas olmmoš jođihit sámedikki dán álgi áigodagas. Njealjis fas lohke doarjut ovddit ságajođiheaddji Klemetti Näkkäläjärvi, guhte oaččui nubbin eanemus jienaid sámedikki válggain čakčat 2011.
Guhtta lahtu eai velá sáhttán guorrasit goappáge njunuševttohasa beallái. Okta almmuhii doarjut soapmása eará go namuhuvvon njunuševttohasaid sámedikki jođiheaddji doibmii. Eará evttohassan sámedikki jođiheaddjin leatge máinnašuvvon Anne Nuorgam ja Anu Avaskari.
Guovtti diggelahtus LK ii fidnen bohčit oaivila das, gii livččii heivvoleamos lahttu ođđa sámedikki ságajođiheaddjin. Ođđa sámedikki ortniiduvvančoahkkin lea 15.2. Anáris.
Sámedikki ságajođiheaddji válljengilvvus sáhttá lohkat suomagillii eanet bearjadaga Lapin Kansas.
