Helsset-guovllu sámiide viimmat fásta deaivvadanbáiki
- Gurot ravddas Nils Valle, Niilo Aikio, Keijo Nuorgam, Pirita Näkkäläjärvi, Hilkka Magga, Tuuni Partti, Pauliina Feodoroff, Minna Majanen, Juho Keva, Maija Lukkari ja Pentti Pieski.
Lulli-Suoma sámit leat viimmat ožžon fásta deaivvadanbáikki Helssegis. Doaibmabáikki lea sámiide fállan ođđa ovttasbargoguoibmi, suomaruoŧŧelaš kultursearvi Arbetets Vänner i Sörnäs.
Virggálaččat fásta ovttasbargu álggii mannan lávvardaga álbmotčoahkkimis, man ledje ordnen sámedikki ođđa áirras Pirita Näkkäläjärvi, City-Sámit searvi ja Arbetes Vänner -searvi.
- Dát lea stuorra lávki Lulli-Suoma sámiide. Mii leat guhkká váillahan iežamet doaibmabáikki Helssegis. Dál mis lea nana vuođđu plánegoahtit fásta sámi doaimmaid dáppe gávpogis, illuda Sámedikki áidna olgosápmelaš áirras Pirita Näkkäläjärvi.
Doaibmabáiki lea Porinties, Munkkiniemi gávpotoasis Helssegis. Vuosttas doaibma ođđa báikkis lea “sámiorrunlatnja”, mii lea álggus rabas oktii mánotbajis. Orrunlanja ulbmilin lea fállat lunddolaš sámegielat birrasa, gos Lulli-Suoma sámit besset deaivvadit, oahpásmuvvat ja ságastallat sámi áššiin.
- Lea hui dehálaš, ahte vehádagat barget ovttas. Mii diehtit bures, makkár lea rahčat iežas giela ovdii birrasis, man váldogiella lea suomagiella. Danin mii hálidit doarjut Lulli-Suoma sámiid, muitala Arbetets Vänner i Sörnäs -searvvi ságadoalli Georg Henrik Wrede.
Vuosttas sámi orrunlatnja rahpasa sotnabeaivve 19.2. Iešguđet orrunlanja temát mearriduvvojit maŋŋelis. Boahteáiggis Porintie báikkis álget maiddái ee. sámegielat mánáid doaimmat.
Koska Ouluun?
Ilmoita asiaton kommentti