Ohcejoga gielddahoavdda virgi rahppo ođđasit ohcanláhkai
Ohcejoga gielddahoavdda virgi almmuhuvvo ođđasit ohcanláhkai. Ohcanáigi jotkojuvvo njukčamánu beallemuttu rádjái. Dán lea Ohcejoga gielddaráđđehus mearridan čoahkkimisttis duorastaga.
Gielddahoavdda virgái ledje mearreáigái boahtán guhtta ohcamuša. Dán vuosttas muttu ohccit leat mielde maid jotkojuvvon ohcanvuorus.
Virggi deavdimis lei gielddaráđđehusas sáhka, muhto mearrádussan šattai virggi rahpan ođđasit ohcamii, nanne Ohcejoga sadjásaš gielddahoavda Raimo Hekkanen.
Son lasiha, ahte gielda háliida ná maid vuordit eará davvigielddaid hoavdavirggiid deavdima, juosgo doppe velá luovvanit lasi dohkálaš ohccit.
– Ovdal gielddaráđđehusa čoahkkima ledje gal gullon navdimat, ahte ohcciid olggobealde soames olmmoš livččii fáluheamin iežas dán virgái. Dát vejolašvuohta ii goit leat boahtán ovdan gieldda hálddahusas, Hekkanen lohká.
Sihke oahpes ja apmasut ohccit
Ohcejoga gielddahoavdda virggi ohcciid joavkkus leat sihke ovddežis oahpes ja Ohcejoga bealde veahá apmasut ohccit. Ohccit leat fárus maid válljema joatkkavuorus, man ohcanáigi bistá njukčamánu 16. beaivái.
Ohcejoga gielddahoavdda virggi ohcama vuosttas muttus ledje mielde restonoma (amk) Marko Hoikkaniemi Haukipudasis, filosofiija magisttar Jaakko Kyllönen Helssegis, filosofiija magisttar Henrik Kunttu Jyväskyläs, filosofiija magisttar Ari Koskinen Kotkas, diplomainšenevra Allan Hamari Ranuas ja servodatdiehtagiid magisttar Päivi Salminen Ohcejogas.
Hamari, Hoikkaniemi ja Kunttu ohce Ohcejoga gielddahoavdda virggi maiddái ovddit háve. Salminen lea fas ovdal leamaš ee. sosiálahoavdda virggis Ohcejoga gielddas.
Ovddit háve Ohcejoga váldostivra váljjii gielddahoavdda čakčat 2010. Dalle virgái šattai hálddahusdiehtagiid magisttar Matti Korkala. Son vulggii eret Ohcejogas go leai doaibman badjelaš jagi gielddahoavdan.
