Guđas ohcan Ohcejoga gielddahoavdda virgái
- Ohcejoga gieldda vearjogovva
Ohcejoga gielddahoavdda virgái leat mearreáigge siste boahtán oktii buot guhtta ohcamuša. Ohcciid joavkkus leat sihke ovddežis oahpes ja Ohcejoga bealde veahá apmasut ohccit. Ohcanáigi virgái nogai maŋŋebárgga.
Ohcejoga gielddahoavdan ohcet restonoma (amk) Marko Hoikkaniemi Haukipudasis, filosofiija magisttar Jaakko Kyllönen Helssegis, filosofiija magisttar Henrik Kunttu Jyväskyläs, filosofiija magisttar Ari Koskinen Kotkas, diplomainšenevra Allan Hamari Ranuas ja servodatdiehtagiid magisttar Päivi Salminen Ohcejogas.
Hamari, Hoikkaniemi ja Kunttu ohce gielddahoavdda virggi maiddái ovddit háve. Salminen lea fas ovdal leamaš ee. sosiálahoavdda virggis Ohcejoga gielddas.
Ovddit háve Ohcejoga váldostivra váljjii gielddahoavdda čakčat 2010. Dalle virgái šattai hálddahusdiehtagiid magisttar Matti Korkala. Son vulggii eret Ohcejogas go leai doaibman badjelaš jagi gielddahoavdan.
– Gielddaráđđehusas golbma molssaeavttu
Virggi deavdimis gielddaráđđehusas leat ovddemustá golbma molssaeavttu, nanne Ohcejoga virgedahkki gielddahoavda Raimo Hekkanen.
– Juos gielddaráđđehus atná soames ohcci birgetmeahttun buorrin earáid ektui, de dat sáhttá árvalit váldostivrii su válljema njuolgga gielddahoavdda virgái.
– Gielddaráđđehusas lea vejolašvuohta maid válljet dihto ohcciid gažadeapmái, man vuođul de maŋŋelis ovddidivččii soapmása válljema gielddahoavdan.
– Juos oktage ohcci ii gielddaráđđehusa mielas deavdde virgái gáibiduvvon gelbbolašvuođa, de goalmmát vejolašvuohta gielddas lea bidjat virggi ođđasit ohcaláhkai, Hekkanen oaivvilda.
Livcce buorre dakkár olbmo váljet gii lea orron gielddas ja ádde sápmelaccai. Jus de bisosii virggistis.
Ilmoita asiaton kommentti