Sámi arkiiva Anáris gárvvis bálvalit dutkiid ja álbmoga
- Sámi arkiiva lea oassi Sajos-kulturviesu doaimmain Anáris. Arkiivabargi, dutki Suvi Kivelä vuordá guoros vuorkáhilduid dievvama. Govven: Jussi Leinonen
Sámearkiiva lea rahpan uvssaidis álbmoga bálvalussii Sajos-kulturguovddážis Anár márkanis. Ođđa arkiivva váldobargun lea ovddidit sámedutkamuša ja lasihit sámiide guoskevaš historjádieđu. Arkiiva sáhttá boahttevuođas bálvalit viidát álbmoga, go dan materiála fidnejuvvo maiddái digitála vuorkái.
Arkiiva bálvala earret dutkiid omd. oahppiid, studerejeaddjiid ja historjáberošteaddjiid. Áššehasaid várás gávdnoge arkiivvas sierra dutkilatnja.
Sámearkiiva váldá vuostá materiála virggálaš servodatdoaibmiid lassin maid ovttaskas olbmuin, servviin ja fitnodagain. Materiála seailluheapmái arkiivvas leat hildut oktii buot 2000 mehtera.
Boahttevuođas Sámi arkiiva rahčá dan ovdii, ahte dan vurkejuvvon materiála fidnejuvvo digitála vuogádahkii. Dan maŋŋá arkiiva šaddá ain viidát olmmošjoavkkuid olámuddui, go digitála materiála lea fidnemis arkiivalágádusa fierpmádatbálvalusaid bokte.
Sámi arkiivva plánen lea álgán jagis 2004. Dat lea oassi arkiivalágádusas. Dat gullá Kansallisarkisto dutkama ja ovddideami vástusuorgái. Sámi arkiivvabargin Sajos-kulturguovddážis Anáris lea dutki Suvi Kivelä.
tuosta ny ota ernokaa selekua.
Ilmoita asiaton kommentti