Ovdajienasteapmi nohkan Suoma presideantaválggas
- Suoma presideantta válljema nuppi muttu ovdajienasteapmi nogai. Aiddonas válgabeaivi lea boahtte sotnabeaivi 5.2. Govva: Jussi Leinonen
Suoma presideantaválgga nuppi muttu ovdajienasteapmi joatkašuvai ealásin maid maŋŋebárgga, mii leige maŋemuš válgabeaivi dán válgga ovdajienasteamis.
Riikkaviidosaččat jienastanmokta dán háve presideantaválgga nuppi oasi ovdajienasteamis lovttai veahá badjelebbui go guhtta jagi dás ovdal.
Sámi leanas leat jienasteaddjit leamaš viššalit jođus das fuolakeahttá, vaikko leana njunuševttohas ii beassan válgga loahppavurrui mielde. Dán presideantaválgga nuppi oasi ovdajienastanmokta molsašuddá dál 30-40 proseantta sulain sierra gielddain davvin.
Suomas presideantaválggaid nuppi muttus olbmot leat leamaš árbevirolaččat viššaleabbot atnit jietnavuoigatvuođaset go válgga vuosttas oasis, duođaštit válgadutkamušat.
Presideantta válljema aiddonas jienastanveaivi lea boahtte sotnabeaivve 5.2.2012.
Guovtti muttu presideantaválga
Go presideantaválgga vuosttas muttus oktage evttohas ii fidnen eanet go beali jienain, de šaddet sirdásit válgga nuppi oassái. Das leat mielde vuosttas muttus eanemus jienaid čoaggán guokte evttohasa.
Vuostálágaid Suoma presideantaválgga loahpparažasteamis leaba ná olgešbellodaga Sauli Niinistö ja ruonáid Pekka Haavisto. Válgga vuosttas muttu gávcci evttohasas Niinistö čokkiige eanemus jienaid, 37 proseantta ja Haavisto fas nubbin eanemus, 18,8 proseantta jienain.
Maŋŋebárgga almmuhuvvon varas oaiviljearahallama mielde 64 proseantta jienasteaddjiin leat Niinistö duohken. Haavisto fas livččii fidnen 36 proseantta doarjaga, jos válggat livčče lean oaiviliskkadeami áigge.
