Sajos geasuhii geahččiid Skábmagovat-filbmadoaluin
- Sajosa Dolla-sále gávnnahuvvui saddjás filbmateáhterin Skábmagovat-festiválas Anáris. Govvejeaddji: Jussi Leinonen
Ollu olbmot besse ohpit dán jagi vásihit ealligovaid Skábmagovat-festiválas Anáris. Lágideaddjiid mielde buoremusat geahččiid geasuhii Sajos-kulturguovddáš. Oppalaččat vuvdojuvvon bielahtaid mearri ollá sullii ovddit jagiid dássái
Dán jagi Skábmagovat-filbmafestivála nogai Anáris vuossárgga. Ođđa áššin ovddit jagiid ektui lei dál Sajos-kulturguovddáža filbmateáhter Dolla, mii vuosttas geardde lei Skábmagovat-čájáhusaid anus.
– Doppe ledje eanemusas juobe 150 olbmo ovtta čájehusas. Sajosa Dolla-sáles sámefilmmat geasuhedje eanet geahččiid go eará álgoálbmotfilmmat, muitala festivála jođiheaddji Aslak Paltto.
Teknihkalaš hástalusat
Nubbi erenomáš ášši Skábmagovat-doaluin lei dán háve njuolggo mediasirdima iskkadeapmi Anára guovssahasteáhtera ja Helssega Annantalo-kultuviesu gaskkas. Govvasirdin lihkostuvai muhtin muddui, muhto jietnabealli guđii ain teknihkalaš hástalusaid lágideaddjiide boahttevuođas.
Anára Guovssahas-teáhtera ja Helsset-gávpoga Annantalo oktasaš reálaáigásaš mediačájáhus galggai leat lávvardaga diibmu 21-22. Skábmagovat festivála dáiddalaš jođiheaddji Jorma Lehtola muitala, ahte geahččaleamis ledje ain teknihkalaš váttisvuođat, muhto sii fidnejedje ávkkálaš vásihusaid.
Govvadearvvahusa fidnjejedje sirdásit Anáris Helssegii. Buohtalassii Anára Guovssahas-teáhteris besse oaidnit Helssega videodearvvahusa mediaoali geahččaleami oktavuođas.
Skábmagovat maid Helssegis
Lávvardaga Helssegis besse dattetge geahččat maid Skábmagovat-filmmaid, go dat ledje doaimmahuvvon dohko ovddalgihtii. Helssega Annantalo šiljjus lei lávvardateahkedis filmmaid olgoáibmočájáhus logemat gráđa buollašis. Čájáhus lei oassi Annantalo Kaamoskuvia Kampissa -dáhpáhusvahkus Helssegis.
Annantalo-kulturviessu ja Skábmagovat ledje dán jagi festiváladoaluin muđuige ovttasbarggus. Miehtá vahku oaivegávpogis čájehedje filmmaid dáinna temáin ”Skábmagovat Goes Helsinki”. Dat lei seammás oassi design-oaivegávpoga Helssega doaluin.
Annantalo-kulturviesus muitalit, ahte sii lea duhtavaččat ovttasbargui Skábmadoalut-festiválain.
Unna árrun dán jage Skábmagovat-festiválas Jorma Lehtola namuha velá Sajosa ođđa Dolla-sále govvaliinni: Dat gávnnahuvvui menddo unnin govdafilmmaid čájeheamis, muhto teknihkka ain buoriduvvo dán jagi vásihusaid vuođul.
