Eurohparáđđi skuldo Suoma ILO-soahpamuša ájiheamis

Eurohparáđi ministtarkomitea gáibidá Suoma dakkaviđe gulahallat sámedikkiin sámiid ruovttoguovllu eananhalddašeamis. Ministtarkomitea attii mannan vahkus ávžžuhusaid unnitloguálbmogiid sajádagas Suomas. Suopma oaččui golbma ávžžuhusa, maid berrešii dalán álggahit ja gávcci iežá ávžžuheami.

Ministtarkomitea čujuha Suoma viggamušaide ratifieret ILO 169 -soahpamuša ja ovttas Suoma sámedikkiin čoavdit eanangažaldagaid.

Suomas hupmojuvvon sámegielaid galggašii ávžžuhusa mielde gádjut sámegiela ealaskahttinprogramma ruđalaš doarjumiin ja beaktilis ollašuhttimiin. Sámegielaid oahpahussii galggašii maiddái dán mielde bidjat eanet resurssaid ja buoridit sámegielat almmolaš bálvalusaid fidnema.

Suoma ávžžuhit maid dađistaga ovddidit unnitloguálbmogiidda dárkkuhuvvon ráđđádallanorgánaid, vai unnitloguálbmogiid ovddastedjiin livččii čielga gulahallankanála ja duođalaš váikkuhanvejolašvuohta mearradusaide.

Ministtarkomitea guorahalla stahtaid viđa jagi raporttaid, manná dárkisteame stahtaid doaimmaid ja válbme dasto ávžžuhusaid iešguđetge riikii. Dát ávžžuhusat gusket Eurohparáđi ollessoahpamuša ollášuhtimii unnitlogu čearddaid suodjaleamis.

Lapin Kansa julkaisee saamenkielisiä juttuja jatkossa muun toimitusaineiston yhteydessä sekä lehdessä että netissä. Aineiston tuottajina toimivat Sulo Aikio Utsjoelta ja Oula-Antti Labba Enontekiöltä.

Juttuideoita ja kommentteja sähköpostiin: sulo.aikio@lapinkansa.fi ja oula-antti.labba@lapinkansa.fi

Sáhkaidejat ja kommeanttat e-postii: sulo.aikio@lapinkansa.fi ja oula-antti.labba@lapinkansa.fi